CICCE, MARIETTA E ‘A CUMMARE di F. Catapano

·        Marietta: Cummara meija stóche avveramènde ‘ngazzàta…..

·        ‘a Cummare: nah’ Mariè e ci de nuije nò stè ‘ngazzàte?!

·        Marietta: ..ma ije no’ stòche ‘ngazzàte ‘n generále, ma piccè Cicce mije s’ ‘na sciùte  ‘na mesáta fa e ije no’ n’ hagghie sapùte cchiù ‘nnijnde……

·        ‘a Cummare: máh, ce sàcce, ma no è stàte tu a dìcere a Cicce addò è fátte ‘a staggiòne, và a fa ‘a vernáte? E quidde se n’ ha sciùte………

·        Marietta: ijè vere, ma ce sácce dopo quatte ánne  d’ cose assième une se ne vè e nò se face sendè chiù? Ce sacce  ‘nge vòle pure curàgge……

·        ‘a Cummare: ce ijè Mariè mo t’ stè manghe ‘u maschele?

·        Marietta: No!… (ravviandosi i capelli) ce te crìde  ca me manghéne l’occasiòne?

·        ‘a Cummare: ‘u sacce, ‘u sacce ca tu è state ‘nu capitane d’ lungo corso……. Mariè t’ arrecuerde d’ ‘u trombettiere?  Quidde sapeve sunà bbuene a tromba….

·        Marietta: e..si ….sapísse ce suéne doce  sunàve…… ( poi guardandola sturtegghiata) e tu ce ne sé d’ come sunàva ‘a tròmba quìdde?

·        ‘a Cummare: no ije ‘nníjnde , tanne ‘u dicevène tótte le fémene d’ Tarde…….

·        Marietta: …..Ma  po’ a me nò me futtève nijnde…

·        ‘a Cummare: già po’ totte dicene accussì………

·        Marietta: Ce è ditte?

·        ‘a Cummare:….nijnde ….nijnde…., mma ‘nzómma Mariè ce è avenùte a fà da me..?

·        Marietta: è raggióne, po’ le descùrse cangéne, ….’nzomma ije vulève vedè ’nnotra vòte ‘a Cicce….

·        ‘a Cummare: butte d’ velène, t’ ha assùte ‘u caùre da ‘mmócche……… ije  hagghie sapùte ca s’ ‘a ste fáce angóra cu’ na cérta signòra addò avè fatte certe fatíje…., e ce ‘ssòrte de fatíje…….

·        Marietta: Cummà a uè cu ‘a spícce mo’? Ma dìmme dòrme cu jédda o tène case ‘assúle’……

·        ‘a Cummare: me pàre ca ste ‘assúle a via Pitagora…po’ ‘u sé come so’ ‘ste cose une cérte vóte ste’ súle e certe vóte accumbagnàte…….

·        Marietta: cummà ‘u sé ce ‘a fà, ‘a scè da quídde e l’ha dicère ca ‘u vògghie vedè , pè na’ certa fatíja….

·        ‘a Cummare: ..ce ijè è ‘mbaràte appure tu ‘u fátte d’ ‘a fatíje?……….

·        Marietta:….Và , và ca  ijè ‘na cósa urgènte………

·        ‘a Cummare: vòche , vòche……,ma tu agghiustáte ‘a cápe……

          (‘a Cummare torna cu’ Cicce)

·        Cicce: …cu a bbòna sera Mariè, m’ ha ditte ‘a cummáre ca tu me vulìve vedè p’ ‘na fatija ……d’ ce cose se tratta?…

·        Marietta: ….na’ ste sta tenda ca s’ ste avène… ce se po’ fa?….. Grazie Cummà, tene ste scíve no?

          Po’ ne sendìme dumáne…..

·        ‘a Cummare : e va bbéne , víde ce me tocca fa!

·        Cicce: ce ste dìce?  Ce vóle?

·        Marietta: No…… niente dumàne n’ama tagghià na  gònna…….

·        Cicce : Mariè dimme a’ veretáte ce cose ijè ca uè? A tenda l’è strazzàte tu mo’, mo’.

·        Marietta: va bè,…….. piccè nò t’ è fatte vedè cchiù? Accussì se ne vònne le cristiane?

·        Cicce: ……tu m’è cacciàte e ije me ne hágghie sciùte……

·        Marietta:….va bbene t’hágghie cacciàte, ma nò pe sémbe…..’u se’ ‘nu pícche m’è mangàte…..

·        Cicce: …..nàh ce vole questa mò? Apprìme me caccia e po’ m’ vòle…….

·   Marietta: dà…. ca no’ ha succisse nijnde …. Aviene acquà damme nù váse……

          ( si baciano) …ca pò questa ijè sémbe cása toije…….

·        Cicce: ….mo’ vóche, pigghíje le ‘rròbbe e avènghe…..

·        Marietta: nò te preoccupà ca le ‘rròbbe l’hagghie accattàte nòve, po’ dumàne sciáme assième….ce nò túrne tra tre mesàte……

·     Cicce: va bè , ce belle lítte ca tiènne quáse quáse nò m’ l’ arrecurdàve cchiù…….